Thursday, January 28, 2010

القاضى مش مستجيب

الجملة دى ولعتنى لما سمعت المحامى بتاعى بيقولها
لكن خلينى ارجع للوراء شوية...بعد ثلاث سنين صبر على ابو اطفالى (ولد 9 سنوات وبنت 7 سنوات) وتجاهله لاولادى بعد طلاقنا ورفضه الانفاق عليهم ولو حتى بجنيه واحد...قررت انى ما اتهاونش فى حقهم اكتر من كده واطالب بحقهم قانوناً.
الاب قدم ما يفيد انه لا يعمل ولا يجد ما يكفيه حتى ينفق على اولاده...والمحامى بتاعى طلب منى ما يفيد الحقيقة واللى هى عكس ده تماماً...وانا ملقيتش حد من معارفه اللى يعرفوا الحقيقة يشهد معايا بحق ربنا...المحامى اتخنق منى...قاللى انتى معاكى الحق وهو كداب....هاتى اى شهود وخلاص يقولوا الحقيقة...انا رفضت لانى خايفة ده يبقى حرام...الجلسة اتاجلت...
كلمنى المحامى النهارده بيقوللى: يا مدام حرام عليكى...حتخسرى القضية...والقاضى مش مستجيب!!!
اصرخ ولا اعيط ولا اتنازل واخلص...القاضى مش مستجيب لحق اولادى عند ابوهم؟؟
القاضى مش مستجيب لانى مش عايزة اجيب شهود فشنك؟؟
القاضى مش مستجيب لتطبيق شرع الله؟؟؟
ده لو حتى فعلا ابوهم عاطل ومش بيشتغل...يسيبوه متخاذل ومتكل على غيره ويعفوه من مسؤليته؟؟
بجد...انا تعبت...الدنيا مصره تكرهنى فى الحق والصدق والامانه...الدنيا مصرة تعاقبنى لما بكون طيبة...بجد...انا تعبت!!