"الطلاق بيدفع ثمنه اتنين، الرجل ماديا، و الست أدبيا... حريتها بتقيد لآن الناس بتحطها تحت الميكروسكوب و بتراقب كل تصرفاتها و تستنالها على غلطة... الست العاقلة لو اطلقت لازم تتجنب أي مجال للشبهة و تراعي تصرفاتها بدل المرة عشرة"
يا ســلام، و جي على نفسك ليه، منخليهم مليون مرة! ماهي اصل الست المطلقة دي فاضية و ماواراهاش حاجة، "صايعة" من الآخر!!!
وريني راجل واحد في المجتمع ده دفع ثمن طلاق كان هو السبب فيه، سواء ماديا أو أدبيا!
بلاش، وريني ست واحدة اطلقت و الناس سابتها في حالها و رحمتها من تعاطف كاذب أو اتهام بانها هي اللي معرفتش تحافظ على بيتها!
و بالمناسبة السعيدة دي، يا ريت نعمل يوم قومي للتضامن مع الأطفال اللي اهاليهم مطلقين، زي يوم الطفل اليتيم كده... ولا لأ انت ماقلتش ان الأطفال بيدفعوا أي ثمن، هو فرح؟!
أنا مش بنكر و لا بقلل من معاناة الرجل بعد الطلاق خصوصا لو كان هو الطرف المظلوم... لكن خلينا نتكلم بموضوعية و صراحة، ده مجتمع "ذكوري متعفن"، رجالته و ستاته يتعاطفوا مع الراجل اكتر بكتير من الست... و مش فاهمة لا ليه و لا عشان ايه، اعمل ايه، محدش راضي يشرحلي!!!
عشان كدة البوست ده هيبقى تضامنا مع الستات اللي اتظلموا في حياتهم الزوجية و اطلقوا (معلش يا رجالة، تقدروا تبعتوا اي حد من طرفكم يكتب بوست عشانكم)
اما الآن، الى المجتمع "القذر" (مش كلمتي):
اشمعني المطلقة يعني؟؟ ماهي لو واحدة مش كويسة كونها متجوزة مايمنعش اطلاقا اي تصرف غلط! و على فكرة بقة، مفيش أي طريقة نعرف ايه اللي في دماغ اي حد، عشان كده بلاش نتكلم في اللي مش فاهمينه!
أنا مطلقة...
بقولها بصوت عالي و مستعدة احط صباعي في عين المجتمع نفر نفر...
هو مين في المجتمع كان عايش معايا و لا حاسس بيا لما كنت عايشة كل يوم بشك في قيمتي كإنسانة؟ احساس لا يوصف اني مهما فكرت و حاولت معرفش اشوف نفسي جميلة أو كويسة لأن الراجل الوحيد اللي مسموح ليه يقوللي كدة بيعمل كل اللي يقدر عليه و زيادة عشان يشككني في نفسي! و لأ مطلقتش عشان كل اللي يشوفني يقوللي اني حلوة و لا يحسسني بانوثتي!
أنا اطلقت عشان ارجع احس اني بني آدم...
و بتعفرت لما حد يحاول يكلم الأخت الأنثى اللي جوايا، لأن مع علمي بمدى ترسخ المعتقدات "القذرة" اللي في مجتمعنا بأن المطلقة "رخيصة"، اي كلام موجه للأنثى بيجبلي نوع نادر من الأرتيكاريا و ساعات بتعامل كأني اتشتمت مش اتجاملت... و دي من العقد اللي جاتلي من العيشة في المجتمع ده!
رجوعا لموضوع اللآدامية... هي مش بتقل بعد الطلاق... بالعكس، عن اجربتي الشخصية، أنا بقيت بحس بالناس اكتر بعد ما اطلقت... في حاجة بتتغير في الواحد لما بيمر بأزمة توجعه كله و تعدي... بيتعلم ان اخوه أو اخته الموجوعين محتاجين نفس المعاملة الآدامية اللي كان هو أو هي محتاجنها... ف ليه بقى نستخسر الآدامية دي ف اللي محتاجنها؟؟ للدرجة دي بقينا وحشين؟ اخص!!
للكلام بقية... أنا جالي أعراض اكتئاب من كتر التفكير في الكلاكيع دي و كمان الكي بورد انجليزي بس غير ان العربي بتاعي يكسف (ايون، أنا عارفة انه يكسف)...
البوست الجي انجليزي!
