Monday, January 12, 2009

للعلم والإطمئنان

أى حد بيقرر ينهى علاقة جواز بيشيل هم حاجات معينة مش بتتغير من إنسان للتانى...والحاجات اللى بتقلق دى ممكن تخلى حد مش عايش مبسوط فترة طويلة اوى لأنه متردد وخايف بسببها
الدنيا مش مستاهلة نخاف منها طالما لنا حق...اللى يخوف بجد وبيرعبنى جداً إنى آجى على حق حد...بس طالما بطالب بحقى يبقى مينفعش اخاف
الفلوس، حضانة الولاد، كلام الناس، المجهول أو ماذا بعد، والولاد حيكرهونى ولا إيه
طيب...الإجابة الواقعية الحقيقية البعيدة عن الكليشيهات والكلام المذوق هى:
الفلوس( ستات غالباً ): بصرف النظرالزوج حيطلع مسئول ومحترم وحينفق ولا لأ...متستنيش، إشتغلى فوراً لو مكنتيش بتشتغلى ورتبى حياتك على إنك المسئولة عن نفسك وعن ولادك حتى لو عندك أهل حيصرفوا عليكى...ده الصح والعقل وتلافياً لمهاترات كتير انتى فى غنى عنها
حضانة الولاد: ما بقاش فيه حاجة اسمها سن الحضانة...المشرع المصرى شاف ان الحضانة مش حق للأم ولا للأب لكن حق الأولاد وشاف ان مصلحتهم ان امهم تربيهم لغاية ما يكبروا ويكملوا تعليم كمان...الحالة الإستثنائة اللى ممكن يطلب الراجل فيها نزع الحضانة من أمهم انه يثبت انها غير كفء ( والمقياس هنا عالى جدا جدا...) وساعتها حتى لو اتحكمله فالحضانة بتتنقل لأم الأم...ما تخفيش على ولادك يا زوجة...متتعبش نفسك يا أب...واعرف انك ممكن تبقى اب هايل سواء نمتوا كلكوا تحت سقف واحد ولا لأ
.
كلام الناس: افتكرى خمس حاجات الناس نفعوكى بيها فى حياتك ...لو لقيتى...أو لقيت...خليك فى حياة غير سعيدة عشانهم!الخوف من الناس وهم فى دماغنا احنا بس
المجهول: المجهول على طول بيخوف...فى أى وضع وحال...وحله الوحيد اننا نفكر نفسنا باننا نركز فى "هنا والآن" خليها مبدأ...المهم: هنا والآن
الولاد حيكرهونى: الولاد بيكرهوا المعاملة السيئة والتجاهل والقسوة وحرمانهم من الحب والعطاء والولاد بيكرهوا الظلم...بس ...الولاد حيخسروا كتير لو شايفين اب وام غير لائق وجودهم مع بعض...الأبوة والأمومة معانى متأسسة فى الإنسان سواء فى أسرة أو بعيد عن الأسرة
أخيراً: نبطل فرجة على المسلسلات العربى ونفهم ان الغرض من الجواز مش رسم صورة وتعليقها على الحيطة لغاية التراب ما يضيع تفاصيلها...الجواز للمودة والسكن والحب بين اتنين وبالتالى عفتهم عشان بقاء النوع يبقى شرعى ومنظم...لو جواز اتنين حيؤدى ان حد فيهم يبقى كاره وبيعانى أو معرض للخطأ يبقى انتفى الغرض منه...يا ريت نفهم عشان نقدر...الولاد حق منفصل عن الجواز...كان نتيجة له اى نعم بس كحقوق بنى آدمين هو منفصل...بما انى مسلمة حتكلم عن دينى: لم يذكر ولا مرة فى القرآن أو السنة حديث أو آية حاجة بتقول: لأ، ما ينفعش تطلقوا عشان الولاد!!!
ملحوظة: شركاء حياة زوجية سعيدة: قدروا النعمة وحافظوا عليها وخللى اللى بيتكتب هنا مقياس وتذكرة بالمهم فى الحياة عشان ما حدش يكره شريكه بسبب فستان أو طبخة...
سلام

4 comments:

Unknown said...

طول عمري بقول الدراما الإجتماعية شوهت معاني كتير قوي وأرست تقاليد عجيبة

حتى في التاريخ الإسلامي كل واحد كان عارف حقوقه أكتر من دلوقتي بكتير والطلاق كان بيحصل من غير كوارث إجتماعية يعني

بجد يا ريت الناس تفهم إن الحياة المفروض تتعاش قدر الإمكان بدل الحياة كأموات

أحييكي على البوست ده

Amjad Wadi said...

تحياتي لصاحبة المدونه ولأسم المدونه التي تروج لحياة كريمه وعلاقه سليمه بعيدا عن دعوات حقوق وتحرر المرأه المزيفه

Ehab said...

ملحوظة: شركاء حياة زوجية سعيدة: قدروا النعمة وحافظوا عليها وخللى اللى بيتكتب هنا مقياس وتذكرة بالمهم فى الحياة عشان ما حدش يكره شريكه بسبب فستان أو طبخة... سلام


بوست هايل

وفيه حاجتين عجبوني
اولا انك مش بتتكلمي عن فكرة الطلاق كهدف سامي ولابد منه
لأ انتي تتكلمي عن الطلاق حل زي اي حل لمشكله ممكن ميكونش ليها حل غير ده
ومنبصش للطلاق على انه حاجه حرام او قلة ادب
ومنقعدش نخاف من فكرة اننا هنظلم عيالنا
صدقيني بنظلمهم اكتر لما بنجبرهم يعيشوا في اسره مبنيه على الخوف والظلم والكره
بنظلمهم لما يكبروا يلاقوا نفسهم مضطرين يتحملوا الوضع المقرف
مضطرين يتقبلوا الواقع والا الطرف القوي هيهددهم بالطلاق اللي بياخد بقى صورة الرعب والهلاك والدمار
ولأن الأم ضعيفه من الأول
ولأنها مخدتش القرار ده من البدايه وخلت نفسها في وضع الضعيف بتخليهم هم كمان ياخدوا نفس الوضعيه
الستسلام والرضا بالواقع علشان المركب تمشي
يعني هي هتيجي عليا انا
ما الكل مستحمل وساكت انا بقى اللي هبوظ البيت
مع ان هو اصلا بايظ ومتنيل
نتيجه سيئه ومستقبل منيل
واولاد متربين على الكره والخوف

وعند اول فرصه للهرب هيهربوا من
مش بس هيهربوا من الظالم ولالمظلوم كمان
لأنه مرتبط عندهم بالجو كله الللي عاشوه سنين


اقولك كفايه رغي بقى لتزهقي

سلااااااااااااااااااااااااام

هيّ said...

تمام يا جوهرى
بيقولوا الزن على الودان امر من السحر...فى اعلام وجهل وتخلف بيزن على ادمغة الناس بقالهم سنين طويلة...نتكلم بقى يمكن نفهم!
الله يكرمك ياخويا :)

أمجد...شكراً على الزيارة والتشجيع والدعوة اللى انت فهمتها هى الدقة بعينها :)


صديقى شنكوتى
متستغربش لو جالك كارت إئتمان تعليق من مدوناتى كلها عشان ابداص متفتكرش انى ممكن ازهق.
القراء اللى زيك نعمة يا اسكندرانى يا بلدياتى :)
ملحوظة: مغتربة عنها برضو :)