Tuesday, January 6, 2009

الطلاق

حاولت أفكر فى عنوان أكثر جاذبية من ده بس بصراحة لقيت ان ما قل ودل احسن
الطلاق...الكلمة اللى تعنى فى أذهان الناس العديد من التعاريف بإختلاف ظروفهم وأهواءهم...وده غريب لأن عادة معانى الكلام واحدة عند كل الناس...بس الطلاق ، اللى عند بعض الناس معناه ممكن يبقى: حرية أو نجاة أو طريق صعب لابد منه أو حل سلمى أو حل واعى منطقى
ممكن يكون عند ناس تانية : بهدلة أو وصمة عارأو تشريد لأسرة أو بوظان كيان إجتماعى أو ظلم من أحد الطرفين أو تخلى عن البيت والعيال...وهنا لازم أذكر ( مش قادره امسك نفسى ) وعيد البعض للست اللى بتطلب الطلاق من أول المجتمع اللى حينبذها لغاية انها مش حتشم ريحة الجنة وستلعن ارضاً وسماءاً
لكن...على أى الأحوال...الطلاق حق مكفول لكل طرف شايف انه مش سعيد...ايوه...مش سعيد على أقل تقدير...ما بالك بقى بالناس اللى طالع عين ابو اللى خلفوها فى جوازة زيها زى الأشغال الشاقة...مش يبقى من حقهم برضوا؟
انا محتاجة اوضح نقطة هامة...الحديث هنا مش خاص بالستات بس..لأ ، بما أنه حق فهو حق للإثنين...حق إنسانى...مش بس لأن ربنا إداه لنا ( المسلمين ) لأ...أنا شايفه أنه حق لكل بنى آدم مهما كان دينه...حقه فى إنه يعترف بإن توقعاته خابت..أو إن إختياره كان سىء أو فى إنه لا يصلح للجواز...أو فى إنه عيل ورجع فى كلامه ( مش بهزر..انا شايفة إن منتهى الجدعنة ان الواحد يجروء وتبقى عنده القدرة يقول انه غلط وحيصحح غلطه ) أو فى إنه إكتشف بلاوى فى شريكه أو إنه إكتشف إنه محتاج أكتر من اللى بياخده فى الجوازة دى....لكن اللى له مزاج يمثل انه فى زيجة ناجحة عشان خاطر كليشيهات فى دماغه ، لا أنا ولا أى حد مش من حقنا نحكم عليه لأن القاعدة دايماً هى : كل واحد حر فى نفسه!
قواعد هامة زى الحرية فى إتخاذ القرار من غير تأثيرات هبلة والقدرة على وزن الأمور وتعديلها ان لزم وحق الواحد فى إنه يطلع من زيجة لا تحقق الغرض منها هى قواعد عامة يللا نتفق عليها الأول قبل ما نغوص فى التفاصيل...ويلا كمان نتفق على الموضوعية...بلاش حمأة والنبى عشان الدنيا مش مستاهلة
الإيمان بالقواعد دى بيدى قوة...وبيدى هدوء كمان...مش القوة بتاعة رامبو ولا الهدوء بتاع الدالاى لاما...لأ ، مش اوى كده...بس القوة اللى نابعة من الإيمان بشىء بتخلى الواحد راسخ من جواه...شايف بوضوح...متمسك بحقه مهما اتهاجم...مش بيتأثر اسلوبه بأحكام الغير...الهدوء بقى بيخلى الإنفعال عادى من غير المبالغة فى الخبط والرزع والضرب والبلاوى اللى الواحد بيسمع عنها دى....بس أهم فضيلة لازم الواحد يزرعها جواه هى الصبر...لأن أغلب الأحيان الطرف الطالب للطلاق بيتقابل بمقاومة شرسة مبنية فى أغلب الحيان على العند أو الأنانية وده بيخللى فى أوقات كتير ( بالنسبة للستات ) رحلة اكتساب مادى لحق مطلق زى الطلاق عملية طويلة ومملة......لكن مفتاح النجاح فى الصبر...دى معركة النفس الطويل زى ما بسميها.
لكل قاعدة إستثناء طبعاً إنما...يعنى
المهم
بعدين حادخل فى الموضوع ان شاء الله

2 comments:

a divorcette said...

Allah yenawar...

u know it's funny!

society tends to make a taboo out of two main things that are allowed in Islam:

1- divorce for both men and women
2- polygamy for men


the way society rejects those two concepts although they are allowed in religion (within reason of course), makes people do worse things to go around them... like enduring an abusing life to avoid divorce, or resorting to 3urfy marriage to avoid announcing a second one!

i don't remember where i meant to go with this, but at least the one thought i still remember is: this society needs education!

Rasha* said...

Yes, true, very true...society needs education. a long process of education.