إلى كل الأمهات المكلومات...

دي مش اخر الدنيا إن بنتك بتطلق...

اه، هي مش حاجة تفرح، و مفهوم إن في مجتمعنا لقب مطلقة ده وصمة...

لكن دي بنتك، و بتمر بأزمة و محتاجة تحس بدعم نفسي و معنوي، مش محتاجة ايد زيادة تحدفها بالطوب...

مدام انتي عارفة ان لها حق و مش بتدلع و لا بتستهبل، و مدام شفتي بعينك الظلم اللي اتظلمته، بلاش تزرعي فيها احساس عقيم بالذنب لا هو هيغير الواقع و لا هيريحلك قلبك، لكن أكيد هيوجع قلبها اكتر...

ساعديها تتخطى الأزمة بدل ما تأزميها اكتر...

بلاش كلام عن الولاد و مصلحتهم، لأن مصلحتها هي في الوقت ده أهم... مش هتفيدهم ببصلة لو هي مدمرة... فمالهاش لزمة تلوي دراعها اكتر ما هو ملوي

و بلاش تطالبيها بالتضحية لأن التضحية بتيجي من الإنسان لوحدها من غير ما حد يطلبها... فمتحسسيهاش انها أنانية لأنها مش قادرة تستمر في حياه تعيسة...

و بلاش الكلام عن كلام الناس و نظرة المجامع، الناس دايما بتتكلم و المجامع ظالم... لو ظلمتيها عشان ترضي الناس و المجتمع، تبقى انانية منك لأنك خايفة منهم أكتر ما انتي خايفة عليها، بنتك...

الناس بترمي كلام و تقول مابيلزقش، لكن الحقيقة انه مش بس بيلزق، لا ده كمان بيجرح، و بيجرح أكتر لما ييجي من أقرب الناس...

شوية دعم و حنية و تفهم... ولله هي مش محتاجة اكتر من كدة...